تمر علينا لحظات في الحياة ..
كل اللي نبغاه ونحلم بيه عندنا .. خلينا نقول معظم اللي نحلم بيه بحكم ان الانسان ما يشبع ..
مع ذلك لازال فيه فراغ قاتل، لازال في غصة، لازال فيه شي في القلب غير مكتمل وما نقدر نشعر بالرضا تماما ..
في هذه الحالة انت لست جاحدة لنعمة ربك، ولست ناكرة للجميل وكمان لست مكتئبة!!
(لأني كنت في هذا الحال وظنيت اني جاحدة نعمة ربنا وبعدها اعتقدت اني حاموت من الاكتئاب !!)
شعورك بالفراغ وبالنقص هذا حقيقي .. انت فعلا تعيشين على بُعد كبير من شي مهم وأساسي عندك وفي تكوين شخصيتك ..
اسمه القيم ..
منظومة القيم هي مجموعة من المعاني أو الأشياء (غالبا تكون معنوية) نحتاج نحققها ونعيش على توافق معاها، وكل ما كنا أقرب لها كل ما صغر هذا الفراغ اللي نحس بيه وكل ما حسينا بالرضا أكثر ..
- القيم كمان هي اللي تخليك تاخذي قرار شجاع جدا! وغيرك ما قدر يخاطر وياخذه، أو العكس ممكن تشوفي وحدة في اعتقادك انها متهورة أو غير مبالية! انما هي عايشة بمنظومة قيمها الخاصة هي يعني أكيد ما حتعيش على منظومة قيم ..
- القيم هي اللي تخليك تقومي من عز هدوءك وسلامك والغضب متفجر من جبينك لأن وحدة من القيم الأساسية عندك انتهكت ..
- القيم برضو هي الشي اللي يصحيك من عز نومك في الفجر والبرد وياعيني الفراش الدافي الوثير، عشان في قيمة انت بتسعي تحققيها ..
- القيم كمان لما تتحقق عندك الناس ممكن تشوفك من برا وتحزن عليك وياحرام بس انت عايشة أجمل ايام حياتك لأن قيمك مو شرط انها توافق المسار اللي رسمه المجتمع، وممكن يكون العكس!!
- تكوني عايشة على المسار اللي راسمه المجتمع والرأسمالية أو “الحلم الأمريكي” والناس تقول واو حياتها مية مية وانت من داخلك فراغ وهاوية سحيقة تطيحي فيها كل يوم قبل النوم !! لأن قيمك غير متحققة في اللي تسويه ..
الآن كلنا ولدنا في هذا المجتمع بمنظومة قيم اتلقنّاها من اللي حوالينا، أهل، مدرسة، أصحاب، إعلام وحطي لي مليون خط تحت الإعلام ..
مثال على القيم المجتمعية: الأسرة، التكاتف، الكرم، مساعدة المحتاج، احترام الكبير .. هذه كلها قيم سامية .. وأيضا هي قيم عامة .. يتفق عليها الجميع ..
وفي قيم أخلاقية عامة مثل الصدق والنزاهة والاحترام والشفافية وغيرها .. هذه قيم إنسانية عامة أي انسان بغض النظر هو من أي مجتمع حتكون مهمة عنده وحيرفض عكسها .. فهي ثابتة عندنا كبشر ..
الإعلام وما أدراك ما الإعلام!!
الإعلام يختلس لقلوبنا ويزرع أهمية لأشياء -ما اخترناها بوعي! انما بالتأثير النفسي السلبي للاعلام- ما تهمنا! ولا راح تضيف لحياتنا بشكل جوهري! انما هي بتضيف ارباح للأشخاص اللي ما يشوفونا غير ماكينات استهلاكية!
مثال عليها معايير الجمال الوهمية وصورة الزواج الرومانسي الوهمي أو السوبر هيرو وغيرها من الأوهام اللي هدفها اننا ندفع أكثر، لكنها فعلينا بتملأنا بالفراغ أكثر وأكثر ونظل نجري ورا سراب، ونبعد كثيييير عن قيمنا الحقيقية اللي تملأنا بالمعنى والرضا في حياتنا ..
على مستوى خاص بكل انسان، في مجموعة قيم خاصة، ممكن تكون إضافية على القيم المجتمعية والانسانية العامة، وقد تكون لديك بعض القيم المجتمعية أهم من غيرها في الترتيب، هذا الشي محكوم بعوامل نفسية وبيئية ..
لكن اللي يهمنا هنا: كل ما أنا كنت أقرب -في تصرفاتي، في أسلوب حياتي، فيما أقدمه للبشرية- لمنظومة قيمي الخاصة -وبالأخص أهم خمس إلى عشر قيم- كل ما كنت أكثر رضا عن نفسي وعن حياتي وأكثر شعورا بالاكتمال وتقدير مالدي ..
كيف أكون أقرب لقيمي ؟
أكيد لما أعرفها الأول !!
بفضل الله ألهمني وأعانني أجمع اللي اتعلمته من تجاربي الشخصية ومن دورات حضرتها في إني اجهز ملف يساعدك لاستكشاف قيمك (الخاصة) وكيف تعيشي باتساق أكثر من كل قيمة منها ..
موجودة في الرابط للتحميل المجاني ..
تحميل ورقة عمل [بوصلتي القيمية]
في حال حبيتي تتناقشي معايا فيما يخص تحديد القيم أنا متواجدة ومن قلبي يسعدني
عن طريق حجز جلسة واختيار الوقت المناسب لك ..
وبامكانك أيضا التواصل معايا على الإيميل
كل الحب لك .. والطمأنينة تغمر قلبك .. سلام ..